Tuesday 10 October 2023

Katihar - कटिहार

कटिहार अक्टूबर महीना म अस्तित्व म पचास साल पहले अइले छेलै, मतलब दु अक्टूबर के पचासवाँ स्थापना दिवस मनैलके। कटिहार र साहित्य, संस्कृति आरू इतिहास बहुते समृद्ध छै लेकिन आइज-काल र युवा को ई सब से कोई मतलब नै छै। ओकरा सीनी के खाली मोबाइल में यूट्यूब वीडियो आरू सोशल मीडिया से मतलब छै। जहाँ नया-नया फ़ोटो डाली क आपनो आप क बड़का कंटेंट क्रिएटर माने छै। हक़ीक़त म इ सब यहाँ वहाँ कुछु-कुछु कॉपी पेस्ट करी क पोस्ट करी दै छै। इतिहास से केकरो मतलब नै छै आरू साहित्य कहाँ जे रहले छै केकरो कोई मतलब नै छै। सरकारी तौर पर भी कुछु बात सही दिशा म कहो त नै बढ़ी रहले छै।

आवो तनी कटिहार र बारे म जानलो जे। ई जिला र नाम दिघी-कटिहार जे पुरना शहर छेलै ओकरे नामो पर राखलो गेले छेलै। मुगल शासन जब छेलै त तेजपुर सरकार ई जिला र स्थापना भेले रहै। १७७० म जब मोहम्मद अली खान यहां गर्वनर रहे तभिये ब्रिटिश ई जिला क छीनी लेलकै रहे। ओकरो बाद ब्रिटिश र समय एकरा अनुमंडल र दर्जा दे के पुर्णिया जिला म जोड़ी देलकै। दु अक्टूबर १९७३ क ई जिला पूर्णिया से अलग करी क नया जिला बना देलकै। कटिहार र त्रिमोहिनी संगम जे कुर्सेला र पास छै जहाँ गाँधी जी र अस्थि १२ फरवरी १९४८ में बहएलो गेले छेलै। ई सौभाग्य बहुत कम जगह क प्राप्त छै जहाँ गाँधी जी र अस्थि प्रवाहित भेले छेलै। यहाँ तीन नदी गंगा, कोशी आरू कलबलिया नदी र संगम छै, कलबलिया नदी जे लगभग ३२ किलोमीटर र सफर करै छै येहा संगम पर गंगा म मिली जै छै। त्रिमोहिनी संगम भारत म सबसे बड़का उत्तरायण गंगा र संगम छै। गंगा नदी यहाँ दक्षिण स उत्तर दिशा म बहै छै। और येहा वजह छै की यहाँ जब गंगा पर भोरका सुरजो र किरण पड़ै छै त एतना सुंदर देखै म लागै छै जेकरो बारे म कहलो जै छै की एतना सुंदर गंगा भोरे भोरे कही नै लागै छै। नेपाल से निकले वाला सप्तधारा र कोशी यही आवी क मिलै छै।

सिक्ख र नौवां गुरु जी श्री तेग बहादुर र यादों म लक्ष्मीपुर म गुरुद्वारा स्थापित छै। ई गुरुद्वारा म गुरुजी स संबंधित बहुत सारा धरोहर सुरक्षित छै। १६६६ म गुरुजी यही एगो गाँव छै कांतिनगर नाम स वही अइले रहै।

गंगा नदी र नजदीक मनिहारी स २.५ किलोमीटर दुरो म बल्दीबाड़ी नामो र गाँव छै। येहा जगह छै जहाँ मुर्शीदाबाद र नवाब सिराज-उद-दौला आरू पूर्णिया र गवर्नर नवाब शौकत गंज र बीच म युद्ध भेले छेलै। 

गोगीबील झील बहुत बड़का अउर खूबसूरत झील छै जहाँ देश विदेश स सालो भर पक्षी आवे छै। पूरा साल यहाँ अलग अलग प्रजाति र पक्षी ऐतै रहे छै खास करी क नवंबर स फरवरी तक रूस से पक्षी बहुत बड़का संख्या म आवे छै जेकरा म बहुतायत म राजहंस और लालसर नामो र पक्षी एतै रहे छै। कुछ सालों से सरकार आवे ई झील के खूबसूरत बनावे ल काम करी रहलै छै।

कटिहार स दक्षिण म मनिहारी नामो र अनुमंडल शहर छै जेकरो बारे म कहलो जै छै की पौराणिक कथा र अनुसार यही भगवान कृष्ण र मणी र आभूषण गिरी गेलै छेलै जेकरा खोजे ल भगवान खुद यहाँ अइले छेलै येहा वजह स यहाकरो नाम मनिहारी पडले छेलै।

कल्याणी झील झौवा स्टेशन स पांच किलोमीटर उत्तर म ई झील छै। यहाँ हर साल माघ महीना म पूर्णिमा म मेला लागे छै लोग लाखो र संख्या म नहावे ल आवे छै। ऐसे के त यहां लोग सालो भर आवे छै लेकिन माघ महीना र पूर्णिमा काफी खास मानलो जै छै। यहां कल्याणी माता र मंदिर छै और एक पुरनका शिवलिंग छै जेकरो बारे म आस पास लोगो र कहना छै कि ई शिवलिंग दिनों दिन बढै छै। 

कटिहार जिला म नदी र कमी नै छै लेकिन आय काल सभे नदी गर्मी म लगभग सुखी जै छै। लेकिन बारिश शुरू हेतै चारो तरफ पानी भरी जै छै। महानदी र की कहलो जै ई नदी कटिहार र बीचो बीच बहे छै लेकिन एकरो खासियत यहां मिले वाला मछली छै, एतना रंग बिरंगा आरू स्वादिष्ट मछली मिले छै की मत पूछो। जूट र फसल यहाँ खूब है रहे लेकिन आय काल कम भाय गेले छै। आय काल मक्का र जमाना छै इतना मकई है छै की बड़ा मुश्किलों स कोनो खेत म दोसरो फसल मिळतो। धानों भी खूब है छै। मखाना त पूछो मत अभी बारिश र समय हर जगह मखाना नजर आवी जैतो। एक जमाना रहे रंग बिरंगा सरसों खूब है रहे। कोशी र वजह से बाढ़ त हर बार झेले छै, पढ़ाई लिखाई र माहौल पहले से बहुत बढ़िया रहे लेकिन हमेशा पढ़ाई लिखाई म पिछड़ा ही रहले लेकिन जे भी बच्चा यहां स बाहर निकली गेले समझो कुछु करी क अइले। शिक्षा म पिछड़ा रहला र बाद भी शुभम कुमार आईएएस म टोपर भेले छेलै। 

ई जिला हमेशा शांत रहले कभी कोनो बड़का कांड नै भेले। हरियाली कटिहार र पहचान छै जिनने जेभो उन्हेँ हरियाली नज़र आवी जैतो। हमरो बोली एकदम अलग छै कही भी जा अलग नज़र अयतोह। बिहार र प्रेमचंद र नाम से अनूप लाल मंडल जी र जन्मभूमि कटिहार र समेली म छै, लेकिन जेतना ओकरा सम्मान मिलना चहियों नै मिलले। 

कटिहार र संस्कृति, साहित्य आरू इतिहास काफी मजबूत आरू सक्रिय रहै समय छै हमे सिनी क एकरो बारे म लिखे आरू बोले र पड़ते तभै कटिहार र बारे म लोग जानते। 

©️✍️ शशि धर कुमार

Featured Post

Katihar - कटिहार

कटिहार अक्टूबर महीना म अस्तित्व म पचास साल पहले अइले छेलै, मतलब दु अक्टूबर के पचासवाँ स्थापना दिवस मनैलके। कटिहार र साहित्य, संस्कृति आरू इत...